Che Vallemi
Americanta
Oiméne tajy poty pe cerro omopytãmba
Oiméne hyakuã porã opárupi ka'aguy
Oiméne ku mainumby ovy'a ha isaraki
Maymáva guyramimi ijayvu ha opurahéi
Che py'águi ndojeivéi upe che Paraguaimi
Umi ysyrymimi panambi oñuãmba
Oime culantrilloita hembére ojere rei
Llantén peteî teî ku hogue hovy asy
Hi'ári katu ipoty aguape kyrỹi guasu
Ha iguýre iñanambusu ju'i rupi'a aky
Ku asucena okúi rei, hyakuãngue nemo'ãnga'u
Panambi hovy guasu oveve ñemi ñemi
Oiméne ku guyra'i opárupi ojaitypo
Eirarúa ono'õ yvotýre omburea
Upéva ijeirarã oipyte ha ohykue'o
Oiméne hyakuã porã ku yvytu cérrogui oúva
Amambái ryakuã oguerúva ka'aru ro'ysã porã
Oiméne ijayvu joa umi ykuágui oúva
Iñakã ári oguerúva kambuchi ha hy'akua
Hi'ãnte chéve ahecha upe che valle ahayhúva
Oiméne ynambu cebói pe ñúre morotîmba
Tetêu ijayvu joa, jahasávo iñangekói
Hi'ãvaicha cherenói che retãmi porãite
Oime che rembiayhukue cherechaséva avei
Cherayhúrõ gueteri ahayhuháicha ichupe
El tiempo hatã oiko ñane akã omyapatî
Ñande rova omocha'î ha ndaikatúi jajoko
Nahi'ãinte la amano mombyryete ndehegui
Aháne rohechami che akãme roguerekóva
Ha amóme avei che'ãhóva rohechaga'úgui ai